ಎರಡೆ ನಿಮಿಷದ ಮೌನಾಚರಣೆ


            ಗೆಳೆಯ ರಟ್ಟೀಹಳ್ಳಿ ರಾಘವಾಂಕುರ ಅವರ 'ಎರಡೆ ನಿಮಿಷದ ಮೌನಾಚರಣೆ' ಎನ್ನುವ ಶಿರ್ಷಿಕೆಯ ಗಜಲ್‍ನ್ನು ಸಾಹಿತ್ಯಾಸಕ್ತರು ಓದಿ ಪ್ರತಿಕ್ರಿಯಿಸಲಿ ಎನ್ನುವ ಕಾರಣಕ್ಕಾಗಿ 'ಮುಕ್ತಕಂಠ' ಬ್ಲಾಗ್‍ನಲ್ಲಿ ಪ್ರಕಟಿಸಿದ್ದೇನೆ. ಸದಾ ಸಾಹಿತ್ಯ ವಿಚಾರ ಸೇರಿದಂತೆ ನಿತ್ಯದ ವಿಚಾರಗಳನ್ನು ಪರಸ್ಪರ ಹಂಚಿಕೊಳ್ಳುವ ನಾವಿಬ್ಬರೂ ಅನಿಕೇತನ ವಿದ್ಯಾರ್ಥಿ ನಿಲಯದ ರೂಮ್ ನಂ.07ರ ನಿವಾಸಿಗಳು. ಈಗಾಗಲೆ ಒಂದು ಕಾದಂಬರಿ ಮತ್ತು ಕಿರುಗವಿತೆಗಳ ಸಂಕಲನವನ್ನು ಪ್ರಕಟಿಸಿರುವ ಇವರು ಯುವ ಸಾಹಿತಿಯಾಗಿ ತಮ್ಮನ್ನು ಗುರುತಿಸಿಕೊಂಡಿದ್ದಾರೆ. ಸಾಹಿತ್ಯ ಕ್ಷೇತ್ರದಲ್ಲಿ ಮಾಡಿದ ಸೃಜನಶೀಲ ಕೆಲಸಕ್ಕಾಗಿ ಪುರಾಸ್ಕಾರಗಳನ್ನೂ ಪಡೆದಿದ್ದಾರೆ. ಸದ್ಯ ದ್ರಾವಿಡ ಸಂಸ್ಕøತಿ ಅಧ್ಯಯನ ವಿಭಾಗದಲ್ಲಿ ಗಜಲ್ ಸಾಹಿತ್ಯದ ಮೇಲೆ ಸಂಶೋಧನೆ ನಡೆಸುತ್ತಿದ್ದಾರೆ. 


ಎರಡೆ ನಿಮಿಷದ ಮೌನಾಚರಣೆ



ನನ್ನ ಮುಂಬರುವ ಸಾವಿಗೆ ನಾನಿದ್ದಾಗಲೇ ಮಾಡಿಬಿಡಿ ಎರಡೆ ನಿಮಿಷದ ಮೌನಾಚರಣೆ
ಕಟು ಮಾತುಗಳಿಗಿಂತ ಮೌನವೆ ಬಲು ಹಿತವೆನಿಸುವ ಎರಡೆ ನಿಮಿಷದ ಮೌನಾಚರಣೆ

ಕಲಿಸಬೇಕಿಲ್ಲ ಯಾರಿಗೂ ಗಾಂಭೀರ್ಯದ ನಟನೆ ಸಾವೆಂಬುದು ಕರುಣೆ ಬಿತ್ತುವ ಕೂರಿಗೆ
ಒಳಗಿನ ಹುನ್ನಾರಕ್ಕಿಂತ ಗಂಟುಮೋರೆಯ ಮುನಿಸೆ ಲೇಸೆನಿಸುವ ಎರಡೆ ನಿಮಿಷದ ಮೌನಾಚರಣೆ

ಆಕಳಿಕೆ, ಕೆಮ್ಮು, ಸೀನುಗಳೆಲ್ಲ ಭಂಗ ತರಬಹುದು ನಿಮ್ಮ ಶ್ರದ್ಧೆಗೆ ಮುಖವಾಡ ಕಳಚುವಂತೆ
ಮೋಸದ ನಗುವಿಗಿಂತ ತಲೆ ತಗ್ಗಿಸಿದ ಮುಖವೆ ವಾಸಿಯೆನಿಸುವ ಎರಡೆ ನಿಮಿಷದ ಮೌನಾಚರಣೆ

ಮತ್ತೆ ಹುಟ್ಟಿ ಬಾ ಎಂಬ ಬ್ಯಾನರ್ ಬುಡದಲಿ ಅನೇಕ ಅಸ್ಮಿತೆಗಳ ಗೂಟ ಬಲು ಭದ್ರವಾದಂತಿವೆ
ಸಂಭ್ರಮಿಸುವ ಅತಿರೇಕಕ್ಕಿಂತ ನೂರು ಸಸಿ ನೆಟ್ಟು ನಿರುಣಿಸುವ ಎರಡೆ ನಿಮಿಷದ ಮೌನಾಚರಣೆ

ಆತ್ಮಕೆ ಶಾಂತಿ ಎಂಬ ಮೊರೆಯ ತೂರುತ್ತಿರಲ್ಲ ನನ್ನ ಹಸಿದ ಕರುಳಿನ ಮೊರೆತಗಳ ಬಲ್ಲಿರೇನು
ಹುಸಿ ಕಂಬನಿಗಿಂತ ತಾತ್ಸಾರದ ಲೋಚಗುಟ್ಟುವಿಕೆ ಇಂಪೆನಿಸುವÀ ಎರಡೆ ನಿಮಿಷದ ಮೌನಾಚರಣೆ 

ಕ್ಲಿಕ್-ಕಿಸಿದ ಸೆಲ್ಫಿಯನು ಫೇಸ್‍ಬುಕ್ಕಿನ ಗೋಡೆಗೆ ನೇತುಹಾಕಿ ಕರುಣೆ ಗಿಟ್ಟಿಸುತ್ತಾನೆ ನಿರೂಪಕ
ಜಾಲತಾಣ ಸಂತೆಯಲಿ ನನ್ನ ಹರಾಜಿಗಿಂತ ಖುದ್ದು ಅಣಕಿಸುವ ಎರಡೆ ನಿಮಿಷದ ಮೌನಾಚರಣೆ

ಕೊನೆಗೆ ಎಷ್ಟು ಸಲೀಸಾಗಿ ಮೌನಮುರಿದು ನಡೆದೆಬಿಡುತ್ತಿರಲ್ಲ ಯಾರಿಗೂ ಸಂಬಂಧವಿಲ್ಲದಂತೆ
ಖಾಲಿ ಹರಟೆಗಿಂತ ಮೌನದ ಗೊಂದಲಕೆ ಕಿವಿಗೊಡುವ ಎರಡೆ ನಿಮಿಷದ ಮೌನಾಚರಣೆ

ನನ್ನ ಮುಂಬರುವ ಸಾವಿಗೆ ನಾನಿದ್ದಾಗಲೇ ಮಾಡಿಬಿಡಿ ಎರಡೆ ನಿಮಿಷದ ಮೌನಾಚರಣೆ
ಅಂಕುರ ಹಚ್ಚಿದ ಮೌನ ಹಣತೆ ಬೆಳಗಲು ಮನಸ್ಸಿದ್ದವರ ಎರಡೆ ನಿಮಿಷದ ಮೌನಾಚರಣೆ






 
ರಟ್ಟೀಹಳ್ಳಿ ರಾಘವಾಂಕುರ

ಕಾಮೆಂಟ್‌ಗಳು

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಬಹುಮುಖಿ ಪ್ರತಿಭೆ ಕೆ.ಪಿ ತೇಜಸ್ವಿಯವರ ಬದುಕು ಬರಹ

ಇಮೇಜ್
  ಕನ್ನಡದ ದೈತ್ಯ ಪ್ರತಿಭೆ ಕುವೆಂಪು ಅವರ ಮುಂದುವರೆದ  ಭಾಗವಾಗಿ ಕನ್ನಡದಲ್ಲಿ ಸಾಹಿತ್ಯ ಕೃಷಿ ಮಾಡಿದವರು ಪೂರ್ಣಚಂದ್ರ ತೇಜಸ್ವಿಯವರು. ಕುವೆಂಪು ಅವರ ಮಗನಾದರೂ ಬೆಳೆದದ್ದು ಮಾತ್ರ ಅಪ್ಪಟ ಸ್ವತಂತ್ರ ಪ್ರತಿಭಯಾಗಿಯೆ. ಈ ಕಾರಣಕ್ಕಾಗಿಯೊ ಏನೊ ಕುವೆಂಪು ಕಾಡು ಬಿಟ್ಟು ನಾಡು ಸೇರಿದರು, ತೇಜಸ್ವಿ ನಾಡಿನ ಗುಂಗು ತೊರೆದು ಪ್ರಕೃತಿಯಲ್ಲಿ ಲೀನವಾದರು. ಕೆ.ಪಿ ತೇಜಸ್ವಿಯವರ ಬದುಕು ಬಹು ಆಯಾಮದ ವರ್ಣರಂಜಿತ ಬದುಕು. ತಂದೆಯೂ ಮಗನನ್ನು ಯಾವ ವಿಚಾರದಲ್ಲೂ ನಿರ್ಬಂಧಿಸದೆ ಸ್ವತಂತ್ರ ಪ್ರವೃತ್ತಿಯನ್ನು ಮಗನಲ್ಲಿ ಬಿತ್ತಿದರು. ಮಗನ ಪ್ರತಿಭೆಗೆ ನೀರೆರೆದು ಪೋಷಿಸಿದರು. ಅಂತೆಯೇ ಮಗನೂ ತಂದೆಯ ನಂಬಕೆಯನ್ನು ಹುಸಿಗೊಳಿಸದೆ ಕನ್ನಡ ಸಾಹಿತ್ಯ ಲೋಕದಲ್ಲಿ ವಿರಾಜಿಸಿದರು. ಆದರೆ ಅವರ ಅಕಾಲಿಕ ಮರಣ ಕನ್ನಡ ಸಾಹಿತ್ಯ ಲೋಕಕ್ಕೆ ತುಂಬಲಾರದ ನಷ್ಟವಾಯಿತು. ನಷ್ಟಮಾತ್ರವಲ್ಲ ಭವಿಷ್ಯದಲ್ಲಿ ಕನ್ನಡಕ್ಕೆ ಜ್ಞಾನಪೀಠ ಪ್ರಶಸ್ತಿ ಬರುವ ಅವಕಾಶವೂ ತಪ್ಪಿತು ಎಂಬ ನಿರಾಶೆ ಸಾಹಿತ್ಯ ವಲಯದಲ್ಲಿ ಕೇಳಿಬಂತು.     ನಾನು ಇತ್ತೀಚಿಗೆ ತೇಜಸ್ವಿಯವರ ಕಾದಂಬರಿಗಳನ್ನೆಲ್ಲ ಓದಿ ಮುಗಿಸಿದೆ. ಅವರ ಕಥೆಗಳನ್ನು ‘ಅಬಚೂರಿನ ಪೋಸ್ಟಾಫಿಸು’ ಪುಸ್ತಕದಲ್ಲಿ ಓದಿದ್ದೆ, ಅಲ್ಲದೆ ಬಿಡಿ ಬಿಡಿಯಾಗಿಯೂ ಓದಿದ್ದೇನೆ. ಪ್ರತಿಯೊಂದು ಕಥೆ. ಕಾದಂಬರಿಯಲ್ಲೂ ಪ್ರಕೃತಿ ತೇಜಸ್ವಿಗೆ ಬೆರಗಾಗಿ ಕಂಡಿದೆ. ಓದುಗನಿಗೂ ಈ ಅನುಭವವಾಗುತ್ತದೆ ಮತ್ತು ಅವರ ಬರಹಗಳಿಗೂ...
ಇನ್ನಷ್ಟು ಓದಿ

ಕರಾವಳಿ ಬದುಕಿನ ಹಿನ್ನೆಲೆಯಲ್ಲಿ ‘ಗಾಂಧಿ ಬಂದ’ ಕಾದಂಬರಿಯ ಮಹತ್ವ

ಇಮೇಜ್
ಕರಾವಳಿಯ ಬದುಕು ಕನ್ನಡದ ಸೀಮೆಯೊಳಗಿದ್ದರೂ ಸಂಪೂರ್ಣ ಭಿನ್ನವಾದ ಸಂಸ್ಕøತಿಯಾಗಿದೆ. ಈ ಸಂಸ್ಕøತಿಯ ಪೂರ್ಣ ಆಳ, ಅಗಲ ತಿಳಿಯಲು ಕರಾವಳಿಯ ಮಣ್ಣಿನ ಜೀವನದ ಭಾಗವಾಗದ ಹೊರತು ಅದನ್ನು ಗ್ರಹಿಸಲು ಸಾಧ್ಯವಿಲ್ಲ. ಅಲ್ಲಿನ ತುಳು ಸಂಸ್ಕøತಿ ಜಾತಿ, ಮತ, ಪಂಥ, ಭೇದಗಳನ್ನು ಮೀರಿದ ಸಂಪತ್ತು. ಕೇರಳ, ಕರ್ನಾಟಕ ರಾಜ್ಯಗಳ ಒಳಗೆ ಈ ಸಂಸ್ಕøತಿ ಹರಡಿಕೊಂಡಿದೆ. ಇಲ್ಲಿ ಭಾಷೆ ಮತ್ತು ಜೀವನ ಹಾಲು ನೀರಿನಂತೆ ಬೆರೆತು ಹೋಗಿದೆ. ದ್ರಾವಿಡ ಭಾಷೆಗಳ ಸಂದರ್ಭದಲ್ಲಿ ತುಳುವಿನ ಚರ್ಚೆನಡೆದರೂ ಅದಕ್ಕೆ ನೀಡಿರುವ ಕಿಮ್ಮತ್ತು ಎಷ್ಟೆಂದು ಎಲ್ಲಾ ತುಳುವರಿಗೂ ತಿಳಿದಿರುವ ವಿಚಾರವೆ. ಇಂತಹ ಸಂದರ್ಭದಲ್ಲಿ ನಾಗವೇಣಿ ಅವರ ‘ಗಾಂಧಿ ಬಂದ’ ಕಾದಂಬರಿ ಮುಖ್ಯವಾಗುತ್ತದೆ.      ‘ಗಾಂಧಿ ಬಂದ’ ಕಾದಂಬರಿ ಕರಾವಳಿಯ ಒಂದು ಕಾಲಘಟ್ಟದ ಚರಿತ್ರೆ. ತುಳುವ ಸಂಸ್ಕøತಿಯ ಭಾಗವಾಗಿ, ಸ್ತ್ರೀವಾದಿ ದೃಷ್ಟಿಕೋನ, ಸ್ವಾತಂತ್ರ್ಯ ಹೋರಾಟ ಮತ್ತು ಗಾಂಧೀಜಿಯವರ ಚಳುವಳಿಯು ಕರಾವಳಿಯ ಮೇಲೆ ಬೀರಿದ ಪರಿಣಾಮ, ಈ ಎಲ್ಲಾ ದೃಷ್ಟಿಕೋನಗಳಿಂದ ಈ ಕಾದಂಬರಿಯನ್ನು ನೋಡಬಹುದು ಅಥವಾ ಬಿಡಿ ಬಿಡಿಯಾಗಿ ನೋಡಬಹುದು. ಹೌದು ಈ ಕಾದಂಬರಿಗೆ ಮೇಲೆ ಹೇಳಿದ ವಿಭಿನ್ನ ಅಂಚುಗಳಿವೆ. ಬೇರೆ ಬೇರೆ ದೃಷ್ಟಿಕೋನಗಳಿಂದ ನೋಡಬಹುದಾದ ಗುಣ ಈ ಕಾದಂಬರಿಗಿದೆ. ಹಲವು ದಾರಗಳಿಂದ, ವಿಭಿನ್ನ ನೂಲುಗಳಿಂದ ಹೆಣೆದು ಕಸೂತಿ ಹಾಕಿದ ನಾಗವೇಣಿಯವರ ಕಥನ ಕಲೆ ಮೆಚ್ಚುವಂತದ್ದೆ.    ಒಂದು...
ಇನ್ನಷ್ಟು ಓದಿ

ಸಮತೆಯ ಕಟ್ಟು

  ಸಮತೆಯ ಕಟ್ಟು   ಹರಿದ ಅಂಗಿಗೆ ಕೊಳೆತ ಚಡ್ಡಿಗೆ ತೆರಿಗೆ ಕಟ್ಟುವ ಸಮಯ ಬಂದಿದೆ ನಿಮ್ಮ ದೇವರ ಜಗುಲಿ ಮೇಲಿನ ಕಟ್ಟಿಗೆ ಭಯವೂ ಕಾಡುತಿದೆ   ಹರಿದ ಗೋಣಿಚೀಲ ಮಸ್ತಕದ ದಾಸ್ತಾನಾಗುವ ಸಮಯ ಬಂದಿದೆ ಮಸ್ತಕ ಪುಸ್ತಕದಿಂದ ದೂರವಾದ ಕೈಗಳು ನಿಮ್ಮ ಜಗುಲಿ ಮೇಲಿನ ಕಟ್ಟಿಗೆ ಸವಾಲೊಡ್ಡಿವೆ ಸಮಯ ಸರಿದು ಹೋಗುವ ಮುನ್ನ ತೆರಿಗೆ ಕಟ್ಟಿ   ಕುರ್ಚಿಯ ಕಾಲುಗಳು ಅಲುಗಾಡುವ ಸಮಯ ಬಂದಿದೆ ಕಾಲುಗಳೆ ಇಲ್ಲದ ಕಾಲುಗಳು ನಿಮ್ಮ ಕನಸುಗಳನು ಕದಡಬಹುದು ಹೊತ್ತು ಸತ್ತು ಹೋಗುವ ಮುನ್ನ ತೆರಿಗೆ ಕಟ್ಟಿ   ನಿಮ್ಮ ಕಟ್ಟಳೆಗಳನ್ನು ಮೀರುವ ಸಮಾನತೆಯ ಕಟ್ಟು ಬಂದಿದೆ ನಿಮ್ಮ ಬೂದಿ ಹಾರಿ ಹೋಗುವ ಮುನ್ನ ತೆರಿಗೆ ಕಟ್ಟಿ                                                                                                       ...
ಇನ್ನಷ್ಟು ಓದಿ